Es Alser Schlappmaul

rt-go: 1997-09-03

Hosches geheerd ?
Die Diana is dood !


 

Was haasd do geheerd? Mer heerd un sied jo nix anneres. Awwer was soll ich dann dodemit? Ich hun die doch gar net gekennt!

De Karl ist ach dood. Der wo do hinne bei uns am Band geschafft hot. Ganz pletzlich horre de Leffel abgeb. In de Zeitung hot des awwer net gestann un mit Paparazzi hat des ach nix ze due. Noch net emol mit dene vum Arbeitsamt, die gucken ob aaner schwarz schafft. Er hot neemlich an seim Heisje gebaut. No de Arweit un manchmol ach devor schun. Do hot er sich wahrscheins de Rest geb. Un jetzt hockt dehaam soi Fraa mit zwa klaane Kinner un waas net wies weire gehe soll.

Dass die des Heisje halle kann, glab ich net. Vun was dann? Alla ford. Do werd die Bank wirre e Schnäppche mache. Un die Fraa kann froh soi, wann se net ach noch fer die Schulde schaffe muss. Wann se iwwerhaupt e Arweit finnd un en Platz fer eer Kinner. - Des is e Schicksal. Awwer do driwwer schreibt ka Zeitung.

Alla ford. Es Läwe gehd weire.

Eier Alser Schlappmaul

 zurück  Index Alser

Alles gesehen - nix kapiert - alles von vorn gucke!

zur Homepage / Neustart:
rt-go-Homepage